Иеде ламо Эрзя-мокшонь национальной театрасо прявтонь тевень топавтыцякс важоди Светлана Ивановна Дорогайкина. Чачсь сон Краснослободск ёнксонь Ташто Синдрова велесэ. Театрасо важодсь аволь штатной администраторокс ды келень-кортамонь коряс репетиторокс. Кода ютась те аволь шожда иесь, кода эри театрась, теде ёвтни минек кортамосонок.
– Светлана Ивановна, кодат стакачить вастыде прявтонь тевтнень топавтомсто?
– Васенце шкастонть, нама, стакаль. Эрявсь совамс театранть лувс весеме ёндо, чарькодемс потмоёндо. Ды мон вестькак эзинь ульне прявтокс, кода кортыть, арась прявтсо улемань опытэм. Те карми, бути поладат важодеме. Васня весе маряви стакакс, мейле жо састыне-састыне тевесь топавтови. Коллективенть содылия парсте, секскак теньсэ талномат арасельть.
Иесь ютась апак фатя. Минь раминек грузо-пассажирской ГАЗель. Теде арсинек кемень иень перть! Васня учинек, паряк, кияк лезды, кияк кази… Мейле минсь, эсенек вийсэ раминек. Те аёвтавикс кеняркс весе театранть туртов. Ней а эряви сивелемс транспорт, пандомс ламо ярмакт, ней весе эсенек.
– Лисни, ней седеяк ламо карматадо ардтнеме спектакля марто гастролев?
– Арсеманок коряс, бажатано ардтнемс республикань весе районтнэнь. Невтемс спектаклят эйдень кудотнева, интернатка. Эрзянь ды мокшонь велетнева невтемс тиринь кельсэ путовкст. Ансяк аволь свал пурнавить ваныцятне. Колмо ломань икеле невтеме а кармат. А чарькодтяно, паряк, ломантненень а пачтить минек самодо эли эсест арась мелест самс? Понгавтыть яволявтома спектаклядонть колмо часто икеле. Кие соды, кие несы? Арды тенст кодамояк цирк – весе молить. Питненть лангскак а ваныть (циркев билетэсь, саемга, – 350 целковойть, минек – 150). Минек путовкстнэсэ улить тонавтомань ёнкст. Кода пурнамс ваныцятнень? Пек ацирьгавты, истя молить тевтне эсенек республикасо.
– Велетне ней весе чамсть, Светлана Ивановна… Кода ашти тевесь ваныцятнень коряс Саранскойсэ?
– Кода тенк меремс, нать, ваныцянок апак тонавто Нацтеатрантень. Минь ютавтынек пси кортамо, конадонть мейле сынек истямо мельс: эрьва цетьверькстэ театрасо невтевить ансяк эрзянь ды мокшонь кельсэ спектаклят (репертуаронок покш, саты). Ламот кортыть, мелесь пек паро. Тесэяк таго жо стакачи – сыть-арась ваныцят? Ламот пеняцить, зярдо путтано мезеяк рузонь кельсэ: «А мекс аволь эрзякс/мокшокс? Бути улевель тиринь кельсэ – мон савлинь ваномо!» Паро, шка юты, минек премьера – эрзякс эли мокшокс. Некеть жо ломантне, конат пижнесть, пикссэяк а усковить, а таргавить ваномо! Кода сынст чарькодемс, мезе эно тенст эряви?! Вана ёвтнян тенк К.Петровань «Ташто койсэ» путовкстонть. Эряви меремс, те весеме ёндо вадрядояк вадря спектакля. Февралень 12-це чистэ сонзэ ваномо састь... 4(!) ломанть… Кинень невтемс? Путовкссонть важодить 30 актёрт, малав весе труппась. Кода пурнамс ваныцят, кода сынст тонавтомс вечкеме театранть – тень лангсо важодтяно апак лотксе. Минь анокт питнентькак вишкалгавтомс.
К.Петровань "Ташто койсэ"
– Светлана Ивановна, бути чуросто сакшны ваномо национальной интеллигенциясь, мезть уш кортамс лия сферасо важодицятнеде… Ёвтнеде гастрольтнеде. Минь маринек, маласо шкасто тынь ламо мезе невттядо республикань томбале.
– Те истя. Гастролень тевтнень ветямс аволь шожда. Аволь шожда муемс эсенек ваныцятнень. Ардтнемс жо эряви, невтемс прянок, кецявтомс ваныцятнень, мезть кортамс, те минек кшинек! Улить таркат, косо учить эйсэнек, вастыть парсте, залтнэ свал пешксеть! Те: Самара ёнксонь Жигулёвск ды Тольятти оштне, Нижней ёнксонь Дзержинск ошось. Тосо невтнетяно покш спектакля ды мезеяк эйкакштнень туртов. Неть ёнкстнэ сынсь тердить эйсэнек.
Маласо шкасто мольтяно Татарстанонь Буинск ошов. Тосо пурныть Равчирень национальной театратнень фестиваль. Минь усксынек тов А.Толстоень «Делец» путовксонть ды В.Илюховонь «Молодильные яблоки» ёвксонть. Теде башка, сыргатано Тетюшив. Тосо, кода содатано, эрить ламо эрзят ды мокшот, мольтяно Киять велев. Бути сыть ваныцят, мольтяно эштё весть эрзянь эли мокшонь спектакля марто. Эряви кемекстамс мартост сюлмавкст.
Апрелень 7-21-це читнестэ сыргатано покш гастролев: Самара ёнксонь Жигулёвск, Тольятти оштнес, Оренбург ёнксонь Бугуруслан ошов, Северное ды Абдулино районтнэс, Татарстанонь Альметьевск ошов. Тосо невтьсынек Н.Гоголень «Женитьба», А.Толстоень «Делец», И.Черкашинэнь «Злой Тэнгу» спектаклятнень.
Н.Гоголень "Рьвяяма"
– Светлана Ивановна, республикань томбалев ардтнемстэ, кода тыненк лездыть тосонь эрзянь ды мокшонь национально-культурной автономиянь прявттнэ?
– Нама, сынь вастовить мартонок. Сюкпря ёвтавлинь Тольяттинь Эрзя-мокшонь культурань центрань прявтонтень Ю.М.Дёмкиннэнь, Оренбург ёнксонь – М.Д.Кузьминнэнь, Бугурусланонь «Лисьмапря» вейсэндявксонь прявтонтень М.А.Стряпчевнень. Сынь аволь весть парсте лездасть. Паро бу эрьва регионсо улевельть истят лездыцят. Лиятнень пельде жо ульнесть ансяк алтнемат ды чаво валт, кемема неть ломантнень лангс арась, секскак а важодтяно мартост. Минсь вешнетяно лия сюлмавкст.
– Кодат од путовкст аноксты театрась ваныцянзо туртов?
– Неть читнестэ ютась А.Бодулинэнь «Чиполлино» ёвксонь премьерась. Ине Изнямонь 70 иетненень невттяно «Не забывай незабываемое» путовксонть. Фронтонь сёрматнень лангс нежедезь, сценариенть сёрмадызе Екатерина Исайчева актрисанок, режиссёрось – И.Кузьмин. Те карми документальной спектакля. Теде башка, арсетяно вельмевтемс мезеяк ташто путовкстнэнь эйстэ. Миненек састь од актёрт. Те – Юлия Арекаева, Евгения Панькина ды Артём Якомаскин. Сынь прядызь Н.П.Огарёв лемсэ МГУ-нь Национальной культурань институтонть. Налксить зярыя спектаклятнесэ. Садо Национальной театрав семиянек, ялгацек, учотано эйсэнк паро мельсэ! Минь важодтяно тынк туртов!
|