«Морденс» национальной оркестрась ушодызе кинзэ 2005 иестэ Саранскойсэ. Ветицязо – Юрий Буянкин, кона эсь шкастонзо морсесь «Торама» фольклорной ансамблясо. «Морденс» коллективентень сон пурнась ёроков од ломанть: морыцят ды седицят. Изнявкстнэ ушодовсть сеске. Коллективесь кармась невтнеме прянзо эрьва кодамо покш фестивальсэ, конкурстнэсэ. Истя, 2007 иестэ сынь сайсть колмо Гран-прить Весероссиянь конкурстнэсэ («Серебряные голоса» Ивановасо, «Красота спасёт мир» Московсо, «Морозко» Казаньсэ). Теке жо иестэнть якасть Швецияв.
2010 иестэ группантень максозь профессиональной статус, 2011 иестэ сон лемдеви «Морденс» национальной оркестракс. Сынь важодить Национальной театрасо. 2012 иестэ «Сказания предков» этно-рок операнть кисэ «Морденсэсь» лиссь МР-нь Государственной премиянь лауреатокс.
Аволь умок Л.П.Кирюков лемсэ Саранскоень музыкальной училищасо ютась «Морденсэнь» покш концерт. Сон алтавсь сынст 10 иетненень. МР-нь Культурань ды туризмань министерстванть пельде Почётонь грамотасо ды Благодарностьсэ казевсть морыцятне Н.Чекинева, Р.Галишников, О.Семизвонкина. МР-нь Национальной политикань министерстванть пельде «Межнациональной согласиянь кисэ» медальсэ – Е.Алышева, Почётной грамотасо – А.Князьков. Те чистэнть морамонь коллективенть туртов ёвтазельть ламо лембе валт. «Морденсэнь» ветицясь Юрий Буянкин кадовсь мельспаросо концертэнть эйстэ, кадык куш кияк эзь лездаяк, ды весе ютавтызе эсензэ ярмак лангс.
– Минек коллективсэнть ней улить од морыцят. Анна Видманкина чачсь Пенза ёнкссо, тонавтнесь Н.П.Огарёв лемсэ ИНК-со, тонавтсь эйсэнзэ содавикс педагогось Н.И.Бояркин. Малав весе минек моротнень Аня содылинзе. Истя жо морси Мария Кочеткова, сон чачсь Краснослободск ёнксонь Ташто Синдрова велесэ, неень шкане тонавтни Саранскоень музыкальной училищасо. Машань вайгелезэ виев, арсян, икелепелев сон седеяк касы, музыкасо теи покш изнявкст. Саинек од скрипачка – Ольга Семизвонкинань. Сонгак ёроков од тейтересь. А вана седицянок Наташа Чекинёва туи декретс. Минь кецятано сонзэ кис. Алтась тенек иень ютазь мекев самс, – ёвтни Юрий Буянкин.
Коллективесь ламо ардтни лия регионга. Аволь умок морасть Нижней Новгородсо, косо панжовсь минек артыцянть Юрий Дыринэнь выставказо. Теде мейле якасть Эстонияв. Тов сынст уш мелят тердинзе «Fenno-Ugria» вейсэндявксонь консультантось-советникесь Яак Прозес.
Эстониясо «Морденсэсь» макссь колмо концертт Таллиннсэ ды Тартусо. Сынь морасть этнокафесэ, од ломанень вень клубсо ды культурань центрасо.
– Эстониясо пек ламо музыкальной эрьва кодат коллективть. Тосо свал ютавтовить морамонь-седямонь конкурст ды фестивальть, ков сакшныть эрьва кодамо масторсто. Минь невтинек эрзянь ды мокшонь музыкальной культуранть. Невтинек кода цёрань, истя жо авань морамо, ламо вайгельсэ морамо. Морынек саевкст «Эрямонь парьстэнть» ды «Сказания предков» этно-рок операстонть. Миинек дискт. Тосо понгинек «Эрзянь келень чис», конань ютавтсь Эстононь-эрзя-мокшонь вейсэндявксось (прявтось Н.Константинова), – ёвтни Юрий Буянкин.
Сон ды весе коллективезэ кадовсть покш мельспаросо омбо масторонь гастрольтнеде. Маласо шкасто «Морденсэсь» таго сырги килангов. Сынст учить Пензань государственной филармониясо.
Т.Маторкина
| 
