Понедельник, 24.01.2022, 20:22 Красноcлободск Приветствую Вас, Гость
 
Главная | Форум | Регистрация | Вход | RSS
Погода в Слободе

Погода в Краснослободске на неделю!


Перекресток

Канал на YouTube
Говорит и показывает...
YouTube - Краснослободск, Мордовия!

Форма входа

15244 просмотра

Поиск в КС

Календарь событий
«  Март 2017  »
ПнВтСрЧтПтСбВс
  12345
6789101112
13141516171819
20212223242526
2728293031

Статистика

Сейчас в Слободе: 2
Гостей: 2
Жителей: 0

Сегодня поздоровались:

Наша кнопка:

Краснослободск, Мордовия


Опрос

В 2016 году планируется установка памятника солдату Великой Отечественной войны в г.Краснослободске (нынешний мемориал, безусловно, останется на своем месте).


  Фотогалерея

Новинки в фотоальбомах

Случайные фотографии

  Новости раздела:
Главная » 2017 » Март » 2 » Книга Мордовиянь промыслатнеде
11:38
Книга Мордовиянь промыслатнеде

А.С.Пушкин лемсэ Национальной библиотекасо ютась историянь наукань докторонть, Н.П.Огарёв лемсэ МГУ-нь профессоронть А.С.Лузгинэнь «Народные промыслы мордовского края» книгань презентация. Александр Степанович ламо иень перть яви мель промыслатнень ванномантень. «В тесном соседстве» промыслатнеде сонзэ васенце книгазо лиссь 30 иеде икеле – 1987 иестэ. 1993 иестэ – «Промыслы Мордовии», 2011 иестэ – «Жизнь промыслов», кона 2007 иестэ одс нолдазель. Ды вана ней од книга, кона пештязь од информациядо, ламо муевкстэ. Презентациядонть икеле минь вастовинек книгань авторонть марто ды кортнинек промыслатнеде. 

– Александр Степанович, кодат промыслатне ёмавтозь ды зярдояк а вельмевтевить? 

– Ёмавтозь промыслатнень юткс кандовлия рогожань промысланть. Мордовиянь малав весе уездтнэсэ тейнесть рогожат. Сехте ламо – Краснослободск ёнкссо. Ломантне семиянек молильть вирев, косо анокстасть пекше чувтонь керь. Мейле сонзэ кавто ковт лопавтсть ведьсэ. Августонть прядовомсто керенть таргилизь. Теевезь левшенть костилизь жердя лангсо. Сехте парокс лововсь ашо левшесь, кона кувакаль, эйстэнзэ парсте ставсть рогожатне. Эйсэст кодасть цёратне сёксня ды тельня. Те промыслась стака. Истя жо сынь тейневсть станоксо. Лиякс меремс, неть ульнесть нардев кескавт, конат а начкильть. Эсь шкасто пек эрявикст ды вешевикст. Рогожатнесэ эрьва мезть усксесть: сюро, почт, кши, калт. Сынь явовсть покшолмань, нардевчинь, тюсонь коряс. Рогожатнень марто кодасть левшень мешокт. 
Карень кодамось истя жо ней арась. Бути ансяк сувенирэнь карть коды Покш Березникбуень Дегилёвкань эрицясь, Ине Отечественной войнань участникесь Н.Г.Никитин. 

– Кодат промыслатне ульнесть лия ёнов а молицят, чуросто вастневицят? 

– Лия ёнов а молиця промыслакс ловови мебелень промыслась. Ванстовсть документт, косо пачтяви ялакстнэде Арискинтнэде, сынь тейнесть стулт, креслат, дивант, качалкат. Ушодызь те тевенть Дубёнка ёнксонь Кобале велень кедьчелькев столяртнэ – Никифор ды Ферапонт Арискинтнэ. 1873 иестэ лесничеенть кармавтоманзо коряс анокстасть венской стулонь партия. Зярдо те лесничеенть таркас ладязель лия ломань, кона вечкилизе европань стиленть, сонгак энялдсь теемс венской мебель. Мейле шнынзе ялгатнень икеле, мастертнэде кармасть содамо ламо ёнкссо. Стултнэнь ялакстнэ тейсть тумосто, нама, сынь питнеельть, аволь эрьва ломаннень рамавильть. Арискинтнэде башка, лиятнеяк кармасть тейнеме мебель. Кобалень кедьчелькевтненень сакшность заказт Симбирскоень, Самарань, Казанень лавкатнестэ. Венской стулонь промыслантень лездась Карл Иванович Юртенс, кона кирдсь мебелень лавка Симбирскойсэ, вете иень перть сон рамсесь теевксэст. Мейле Кобалень эрицятне мусть седе сюпав заказчикть. 
1911 иень сёрмадстоманть коряс, Кобалесэ эрясть 134 столярт, сынст ютксо 125 – мебелень тейницят. Сехте паро мастертнэ невтнесть теевксэст уездэнь, губерниянь ды весероссиянь кустарно-промышленной выставкатнесэ. 1913 иень Весероссиянь кустарной II-це выставкасонть, кона ютась Санкт-Петербургсо, Кобалень мебельщиктне сайсть сиянь ниле медальть. Мебель истя жо анокстасть теке уездэнь Тыргаксо, Майнинасо, Сырезьвелесэ ды Кенде велесэ, бути ваномс Россиянть келес, те – Пермень губерниянь кавто уездсэ. Дубёнкань музейсэ ванстовсть Весероссиянь выставкасо улемадо документт, Кобалень кедьчелькевтнень инструментэст. Книгасонть ули 1912 иень чуросто вастневиця фотография. Эйсэнзэ невтеви, кода мастертнэнень максыть лицензия, конань марто мереви якамс выставкав-ярмункав. 20-30-це иетнестэ велесэнть панжокшность мебелень теемань цех. 

– Александр Степанович, книгасонть ламо фотографият. Косто сынст муинк-пурнынк? 

– Фотографиятне Пенза, Ульяновск, Тамбовск ёнксонь музейтнестэ ды архивтнестэ, истя жо эсенек республикань. Теде башка, колмошка иеде икеле Интернетсэ появасть 1870 иень кезэрень фотографият. Те покш муевкс! Фототне Шотландиянь ды Россиянь художникенть, фотографонть Вильям Каррикень. Россиясо сон ловови васенце этнографокс-фотографокс. Симбирской губерниясо, Сура леенть перька аштиця эрзянь велетнесэ сон ульнесь кавксть: 1871 ды 1875 иетнестэ (Покш Березникбуе, Сурвеле, Судосева, Корсун, Сенгелей ды лият). Сонзэ фототнень ютксо – «Бурлачки на Суре», «Рыбаки на Суре», истя жо эрзянь тейтерь-аватне. Кобалень венской стултнэяк улить фотосонзо, эйсэст ков-бути пачтить лейга. 

– Александр Степанович, кодат промыслат ванстовсть ды улить неень шкане? 

– XIX пингенть прядовомсто XX пингенть ушодкссто минек ёнкссо зярыя таркасо кевердсть кемть: Ладасо, Орозбиесэ, Шишкеевасо, Ямщинасо. Специализированной кемень кевердема ульнесь Спасской уездэнь Покасы велесэ. Неень шкане кемень кевердемась парсте ванстовсь Орданьбуе ёнксонь Орозбие, Ташто Орданьбие ды Кеченьбие велетнесэ. Орозбиень цёратне те шкас кевердить кемть, микшнить эйсэст. 2006 иестэ велесэнть панжозь кемень музей. Орозбиев сакшныть сёрмат Россиянь эрьва кодамо ёнкссто, ломантне энялдыть кучомс тенст кемть. 
Кода а ледстямс Кочкурбуень Вирь ало Тавлань чувтосто керсицятнень? Те промысланть эсь шкастонзо ушодызе Н.И.Мастин тонавтыцясь. Велесэнть сон панжокшнось экспериментальной художественной школа. Зяро эйкакшт тосо тонавтнесть! П.В.Рябов, саемга, пурнакшнось «Тавлинский сувенир» кооператив. Вирь ало Тавлась – республикасо вейкине веле, косо чачсть ды эрить мастертнэ, художниктне, конат лововить РФ-нь Художникень союзс совицякс. Чувтосто керсемась поладови нейгак. Велесэнть важоди чувтосто керсемань школа, конань прявтсо А.П.Гаушев мастерэсь. 



Тешкставлия Темникова ёнксонь промысланть – кружовань кодамонть. Кедьчелькев кодыцятнеде кадовсть аволь ламо. Кодамось кувака ды стака. Тенень эряви тонавтнемс. Кружовань кодамонь коряс паро специалистэсь А.А.Мануилова. 

Теньгушевасо кодыть ревень понань эрьва кодамо тюсонь варьгат, носкат. Те промыслантень мель яви Н.В. Акимкина. Теке жо райононь Щербинкинтнэ тейнить ды артыть эрзянь ды мокшонь матрёшкат. 
Ташто Теризморга велесэ явить мель декоративно-прикладной творчествантень. Эйкакштнень тосо тонавтыть викшнеме, тейнеме-мазылгавтомо раськень оршамопельть. 

*** 
А.С.Лузгин книгань презентациянзо арсизе ютавтомс парсте ды мельстуезь. Сон тердинзе Орданьбуе ёнксонь Орозбие велень эрицятнень, конат кевердить кемть: инжетненень сынь невтизь, кода кевердемс кемть, выставкасонть неизь лембе кемтнень. Истя, Ю.А.Аксёнов мастерэсь невтсь кемень кевердемань мастер-класс. Вакссонзо 9-це классонь тонавтницясь Коля Уряднов ды тонавтыцясь М.Г.Лукин невтнесть, кода кевердемс сувенирэкс вишка кемнеть. Н.Н.Маторкина ды Н.М.Аксёнова викшнесть кемть. 11-классонь тонавтницятне Марина Костина ды Люда Слатникова тейсть фильцевания – коське кевердема. Те эрьва кодамо тюсонь ревень понасто картинань ды лия мезень тейнема. Тейтернетне ветеце классто саезь яксить «Мастерица» ды «Рукодельница» кружокс, конань вети В.И.Костина. Тонавтыцянть валонзо коряс, стака явомс эйкакштнень марто, тедеде прядыть школа. Сынст теевксэст свал невтневить райононь ды республикань пелькстамотнесэ. Маштыть эрьва мезень тееме. А стяко те вастовомасонть сынь казевсть МР-нь Образованиянь министерстванть пельде Благодарностьсэ. 

МР-нь Культурань ды национальной политикань министерстванть пельде «За межнациональное согласие» медальсэ казевсь Орозбие велень прявтось А.И.Аржаев, Почётной грамотасо – Ю.А.Аксёнов мастерэсь. 

– Минек ёнкссо чачсть ламо кедьчелькев ломанть. Эрьва велесэ эрить кодаткак мастерт. Нама, сыненст эряви лездамс. А.С.Лузгин книганть нолдамсто тейсь покш тев. Сон домкасто ваннызе промыслатнень историянть, чарькодевиксстэ пачти ловныцятненень седе, мезенть пурнась ламо шкань перть, – кортась Эрзянь ды мокшонь раськень регионъютконь общественной вейсэндявксонь прявтось Ю.А.Мишанин. 

Т.МАТОРКИНА 
Фототне Э.Ретунскоень


Категория: Новости | Просмотров: 708 | Добавил: VETKA | Теги: книга, Мордовиянь, промыслатнеде | Рейтинг: 5.0/1
Добавлять комментарии могут только зарегистрированные пользователи.
[ Регистрация | Вход ]
Троицкий собор

Старец Иероним

К 90-летию Краснослободского р-на

О Новом Зубареве

Русское Маскино

Интересные статьи

Мнения о новостях
А насколько это все законно?
А если это вынести на общественное обсуждение - например, к Малахову на канал?))
И чтобы об этом высказалась Администрация Президента России. Ну хотя бы Песк




7160 просмотров


При копировании данных ссылка на сайт http://kc13.ru/ обязательна | Краснослободск ©2022 |